填表格

公司搞講座，有張online form俾人填，上面可以俾人填兩個人的資料。

有男人來電查詢....

男︰我想問下呢...你地8月22日搞o個個呢.....o個個seminar呢.....我點解未收到通知﹖

我︰唔好意思先生，我地仲未send e-confirmation, 應該會o係呢個星期尾send俾成功登記的人士

男︰點會，我朋友同我講佢已經收到。

我︰我地呢個星期先會send出去，所以應該未有人收到。

男︰咁就神奇喇......咁我而家再幫朋友登記都仲可以嗎﹖

我︰可以，deadline係8月10日

男︰好, byebye

(收線後30秒)

男︰唔好意思黃小姐，我想問張form有兩個姓名欄，係咪可以填兩個人﹖

我︰係呀。

男︰咁樣，填名係填人名定公司名﹖

我︰係填人名，公司名o係下面o個欄。

男︰哦...見到...但我見到公司名o個欄後面括住如適用，咁唔填得唔得﹖

我︰可以，淨係填人名, 電郵同電話都ok的。

男︰咁但係唔填公司名對我係咪成功登記有冇關係架﹖

我︰冇關係的，可以用個人身份參加。

男︰好的，bye。

(收線後又30秒)

男︰呀黃小姐，我又想問呢人名係咪一定要身份證個名﹖

我︰唔使架，唔一定要一樣。

男︰咁即係可以用我christian name﹖

我︰可以的。

男︰咁我入場時你點知係我﹖

我︰成功登記的參加者將會收到一個e-confirmation的email，只要print out個email入場時出示返就可以了。

男︰唔該晒，bye。

(收線後又又30秒)

男︰呀黃小姐，我剛剛send左兩次application過來，你收唔收到﹖......